Դդմաշենում գրանցվել է կորոնավիրուսի բռնկման նոր օջախ. մարզում 149 դեպքից 39-ը Դդմաշենում է. Սանոսյան

Գեղարքունիքի մարզի Դդմաշեն համայնքում գրանցվել է կորոնավիրուսային հիվանդության բռնկման նոր օջախ: Այս մասին Facebook-ի իր էջում գրել է Գեղարքունիքի մարզպետ Գնել Սանոսյանը:

Նա, մասնավորապես, նշել է.

«Գեղարքունիքի մարզի հարգելի՛ բնակիչներ․

Հաշվի առնելով, որ Գեղարքունիքի մարզի Դդմաշեն համայնքում գրանցվել է կորոնավիրուսային հիվանդության բռնկման նոր օջախ՝

ՀՀ պարետ Տիգրան Ավինյանի 6 մայիսի, 2020 N 66 որոշման համաձայն` (https://www.gov.am/files/docs/4041.pdf),

Գեղարքունիքի մարզի Դդմաշեն համայնքի մուտքի եւ ելքի հատուկ ռեժիմ է սահմանվում, եւ կիրառվելու են սահմանափակումներ։

Որոշման համաձայն, համայնքի վարչական սահման մուտք գործելու եւ վարչական սահմանից ելք կատարելու համար սահմանվել է հատուկ ռեժիմ։

Սահմանափակումներն ուժի մեջ են մտնում 2020 թվականի մայիսիի 6-ի՝ ժամը 18։00–ից մինչեւ 2020 թվականի մայիսի 16-ը` ժամը 23:59-ը։

Այսօրվա դրությամբ մարզում հաստատվել է 32 նոր դեպք, ընդհանուր ունենք հաստատված 149 դեպք, որից 39 դեպք Դդմաշեն համայնքում։ Հաստատված դեպքեր ունենք նաեւ մարզի Վարդենիս, Մեծ Մասրիկ, Շատվան, Սոթք, Նորակերտ, Ծովինար, Ծովազարդ, Սեւան եւ Գեղամավան համայնքներում։

Դդմաշենում առաջին դեպքը գրանցվել է հուղարկավորության հետեւանքով, այլ մարզից ժամանած ազգականների շփման արդյունքում։

Մեծամասամբ նոր դեպքերը գրանցվել են մեկուսացված եւ ինքնամեկուսացված քաղաքացիների շրջանում։

Բոլոր վարակակիրների շփման շրջանակը պարզվել է, նրանց մի մասը ինքնամեկուսացված է, մի մասը` մեկուսացված։ Գործընթացը կրում է շարունակական բնույթ։

Ձեր եւ բոլորի անվտանգությունից ելնելով կոչ եմ անում՝

• մնացե’ք տանը,

• սահմանափակե’ք շփումները,

• հետեւե’ք անձնական հիգիենային,

• հաճախակի լվացե’ք ձեռքերն օճառով` առնվազն 20 վայրկյան տեւողությամբ, հատկապես սնունդ ընդունելուց առաջ եւ տուն մտնելուց հետո,

• հնարավորության սահմաններում նվազեցրե’ք հանրային վայրերում գտնվելը եւ տրանսպորտից օգտվելը,

• շփումների դեպքում պահպանե’ք առնվազն 1 մետր հեռավորություն,

• գրիպանման երեւույթների առկայության դեպքում չզբաղվե’լ ինքնաբուժմամբ, տեղեկացնել բժշկին,

• պարբերաբար կատարեք ջերմաչափում` արդյունքների մասին տեղեկացնելով բժշկին,

• խուճապի մի’ մատնվեք եւ հետեւեք Ձեր բժշկի խորհուրդներին:

Աղբյուր՝
https://news.am/arm/news/576863.html

Оставьте первый комментарий

Оставить комментарий

Ваш электронный адрес не будет опубликован.


*